GƏNCƏ DÖVLƏT UNİVERSİTETİNİN ƏMƏKDAŞLARI “BEYNƏLXALQ HƏFTƏ”DƏ İŞTİRAK ETMİŞLƏR
Bakı Biznes Universitetində “Erasmus+” proqramı çərçivəsində xaricdəki universitetlərin keyfiyyət təminatına dair təcrübələrin Azərbaycan ali məktəblərinə ötürülməsi məqsədilə tədbir keçirilmişdir.
“Ali Təhsildə Keyfiyyət Təminatı” üzrə “Beynəlxalq həftə” adlı tədbirə Gəncə Dövlət Universitetinin Elm və innovasiyalar üzrə prorektoru, millət vəkili Pərvin Kərimzadə və Keyfiyyətin Təminatı Mərkəzinin müdiri İsmayıl İsmayılov da iştirak etmişlər.
Tədbirdə həmçinin Təhsildə Keyfiyyət Təminatı Agentliyinin İdarə heyətinin sədri, Avropanın 6 qabaqcıl universitetlərinin -İngiltərə, İsveç, İspaniya, İtaliya, Türkiyə və Polşa universitetlərinin nümayəndələri və Azərbaycanın ali təhsil müəssisələrinin əməkdaşları da qatılmışlar.
“Keyfiyyət təminatının ali təhsildə rolu”, “Jaen Universitetinin keyfiyyət təminatı sistemi”, “İspaniya planlaşdırma və qiymətləndirmə sistemi”, “Tuscia Universitetində daxili keyfiyyət təminatı sisteminin qurulması və icrası”, “Keyfiyyətin təmin olunmasında özünüqiymətləndirmə fəaliyyətinin mahiyyəti və faydaları”, “Polşa universitetləri təcrübəsində tədrisin keyfiyyətinin təmin edilməsi mexanizmləri və tədris prosesinin qurulması” mövzularında təqdimatlar keçirilmişdir.
Təlimlərin növbəti günlərində isə xarici partnyorlar tərəfindən təhsil proqramı üzrə komitələrin funksiyaları, pofessor-müəllim heyətinin qiymətləndirilməsi, dekanların keyfiyyət təminatında rolu, strateji planlama, daxili audit, məmnunluq sorğularının keçirilməsi istiqamətlərində seminarlar və təcrübə mübadilələri aparılacaqdır.
TƏLƏBƏLƏRLƏ MAARİFLƏNDİRİCİ GÖRÜŞ KEÇİRİLMİŞDİR
Gəncə Dövlət Universitetinin Tələbə Gənclər Təşkilatının təşkilatçılığı ilə debat klubuna yeni üzv olan tələbələrlə görüş keçirilmişdir.
Görüşdə çıxış edən universitetin Tələbə Gənclər Təşkilatının sədri Fuad Dadaşov qeyd etmişdir ki, universitetimizdə fəaliyyət göstərən Tələbə Gənclər Təşkilatı tələbələrin fəallığını artırmaq, onların intellektual inkişafını yüksəltmək və fakültələr arasında sıx əlaqələri formalaşdırmaq istiqamətində mühüm işlər həyata keçirir. Debatların keçirilməsində isə əsas məqsəd tələbələrin fəallığının artırılmasına nail olmaqdır.
Görüşdə debat klubuna yeni üzv olan tələbələrə debatların daha yaxşı şəkildə təşkilinə dair məsləhətlər verilmiş, onların praktik olaraq daha yaxşı anlaması üçün oyunlar keçirilmişdir.
Sonda tələbələrin sualları cavablandırılmışdır.
LAÇINLILAR TEZLİKLƏ ÖZ ATA-BABA YURDLARINA QAYIDACAQLAR
Laçın rayonu 1930-cu ildə inzibati ərazi vahidi statusu alıb. Rayonun ərazisi şimaldan Kəlbəcər, cənubdan Qubadlı, şərqdən Xocalı, Şuşa və Xocavənd rayonları, qərbdən isə Ermənistanla həmsərhəddir. Rayonun 1 şəhər, 1 qəsəbə, 125 kəndi vardır. Ümumi sahəsi 1835 kvadrat kilometri olan Laçın rayonu 72 min hektar yaylaq sahəsinə və 34 min hektar zəngin meşə massivinə malikdir.
Digər ərazilərimiz kimi 1992-ci ildə Laçın rayonu da erməni silahlı birləşmələri tərəfinən işğal olundu. Rayonun işğalını reallaşdıran düşmən qüvvələrinin böyük hissəsi Laçın dəhlizi vasitəsilə daxil oldu. Laçın rayonunun işğal altına düşməsi faktiki olaraq Ermənistanla Dağlıq Qarabağ arasında coğrafi bağlantı yaratmışdır. İşğal nəticəsində Laçın rayonunun əhalisi etnik təmizləməyə məruz qalıb, 300-dən artıq hərbi və mülki şəxs həlak olub və itkin düşüb. Rayonun əhalisi 79.1 min nəfər olmaqla respublikanın 57 şəhər və rayonunda müvəqqəti məskunlaşıb.
217 mədəniyyət, 101 təhsil, 142 səhiyyə müəssisəsi, 462 ticarət, 30 rabitə, 133 idarə və müəssisə, 5 musiqi məktəbi, 1 internat məktəbi, 1 orta texniki peşə məktəbi, 2 avtonəqliyyat və müxtəlif təyinatlı istehsal müəssisələri işğalçılar tərəfindən talan və məhv edilib. 54 dünya, 200-dən çox yerli əhəmiyyətli tarixi abidə vandalizmə məruz qalıb.
Ermənistan işğalçı tərəf olaraq Cenevrə Konvensiyaları ilə üzərinə düşən öhdəliklərini kobud şəkildə pozaraq, Laçın rayonunda coğrafi adların dəyişdirilməsi, rayonun təbii resurslarının talan edilməsi və qazanc mənbəyinə çevrilməsi, əsasən, Suriyadan olan erməni əsilli qaçqınlar olmaqla məqsədyönlü məskunlaşma siyasətini apararaq demoqrafik tərkibin dəyişdirilməsi kimi qeyri-qanuni əməllər ilə məşğul olub. Bu cür əməllər bütün beynəlxalq konvensiyalarda hərbi cinayət kimi təsbit edilir və bu cinayət dünya ictimaiyyətinin gözü qarşısında baş vermişdir. Lakin Azərbaycan xalqı özü beynəlxalq qanunlarının aliliyini və tarixi ədalətibərpa etdi. Vətən müharibəsində əldə etdiyimiz qələbə nəticəsində imzalanmış üçtərəfli bəyanata əsasən, 2020-ci ilin 1 dekabr tarixində Laçın rayonu Azərbaycana təhvil verildi. Bundan əvvəl, noyabrın 9-u Laçın rayonunun Güləbürd, Səfiyan və Türklər kəndləri Azərbaycan Silahlı Qüvvələri tərəfindən işğaldan azad edilmişdir. 2022-ci ilin avqustun 26-da isə Laçın şəhəri, Zabux və Sus kəndləri nəzarətə götürüldü.
Qeyd edək ki, 2020-ci il noyabrın 26-da “Laçının azad olunmasına görə” medalı təsis edildi. Müzəffər Ali Baş Komandan, Prezident İlham Əliyevin sərəncamları ilə Laçın rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş Azərbaycan Respublikası Silahlı Qüvvələrinin 8397 hərbi qulluqçusu “Laçının azad olunmasına görə” medalı ilə təltif olunmuşdur.
İşğaldan azad olunduqdan sonra Laçında da abadlıq və quruculuq işlərinə başlanıldı. Burada generasiya gücü 8 meqavat olan Güləbürd, Su Elektrik Stansiyası işə salınıb. Bu stansiya təxminən 7000 nəfər əhalinin elektrik enerjisi ilə təminatında mühüm rol oynayacaq. Burada istehsal olunan elektrik enerjisi Qubadlı rayonunun Xanlıq kəndini, Laçın rayonunun cənub hissəsini və ərazidə yerləşən digər infrastruktur layihələrini elektrik enerjisi ilə təmin edəcək. Rayonun yol-nəqliyyat strukturunun da yenilənməsinə başlanıldı. Prezident İlham Əliyevin sərəncamına əsasən tikilən Kəlbəcər-Laçın avtomobil yolunun uzunluğu 72,8 kilometrdir. Birinci və ikinci texniki dərəcəyə uyğun tikiləcək yolun hərəkət hissəsinin eni 9-16 metr olacaq. İki və dörd hərəkət zolaqlı olacaq yol üzərində altkeçidlər və körpü inşa olunacaq. Yol üzərində 3 tunelin tikintisi aparılacaq. Tunellərin ümumi uzunluğu 9450 metr olacaq.
2025-ci ildə Laçında Beynəlxalq Hava limanının istifadəyə verilməsi nəzərdə tutulmuşdur. İşğaldan azad olunmuş ərazilərdə, o cümlədən Laçında hava limanının inşası bölgənin beynəlxalq statusunu artıracaqdır. Laçın rayonunun Qorçu kəndinin ərazisində inşa ediləcək hava limanı bir neçə mühüm amili özündə ehtiva edir. Burada aeroportun tikilməsi ümumilikdə bölgənin sosial-iqtisadi inkişafına təkan verəcək və turizm potensialının artırılmasına səbəb olacaq. Laçın hava limanının inşası həm də işğaldan azad edilmiş tarixi torpaqlarımızda aparılan abadlıq-quruculuq işlərinin miqyasını göstərir. Laçın aeroportu logistik mərkəzlərin yaradılmasına da töhfə verəcək. Uçuş-enmə zolağının uzunluğu 3 kilometr olacaq hava limanında 6 təyyarə dayanacağının inşası nəzərdə tutulur. “Böyük Qayıdış” Dövlət Proqramına uyğun olaraq Laçın rayonu və bütün başqa rayonlar bərpa olunacaqdır.
Laçın rayonunda heyvandarlıq üçün böyük imkanlar vardır. Artıq ikinci ildir ki, çobanlar ilə qoyun sürüləri oraya göndərilib. Laçın rayonunda yüzlərlə arıçı öz təsərrüfatını qurub və bol məhsul götürür. Müzəffər Ali Baş Komandan İlham Əliyev azad olunmuş Laçına bir neçə dəfə səfər etmişdir.
