Füzuli Beynəlxalq Hava Limanının tikintisinə 2021-ci il yanvar ayında başlanılıb. Hava limanında təyyarələrin enişi iki tərəfdən də təmin olunur. Hazırda uçuş-enmə zolağının və perronun tikintisində torpaq işləri başa çatdırılıb və yol geyiminin tikintisi aparılır. İlkin olaraq sentyabrın 5-də burada birinci sınaq uçuşunun yerinə yetirilməsi planlaşdırılıb. Tikintinin daha da sürətlə reallaşdırılması üçün Quruçayda iki asfalt zavodu quraşdırılıb və işə üç daşqıran qurğu cəlb olunub.
Qeyd edək ki, Füzuli hava limanının tikintisini ölkəmizin bu sahədə ixtisaslaşmış yeganə təşkilatı olan “Azvirt” Məhdud Məsuliyyətli Cəmiyyəti icra edir. Bundan başqa, “Azvirt” MMC Zəngilan və Laçın hava limanlarının tikinti işlərində də iştirak edəcək.
Azərbaycanın aparıcı yol tikinti təşkilatlarından olan “AzVirt” Məhdud Məsuliyyətli Cəmiyyəti işğaldan azad olunan torpaqlarda reallaşdırılan quruculuq işlərində aktiv iştirak edir. Bu təşəbbüslərdən biri olan Zəfər yolunun uzunluğu 101 kilometr olacaq. Yol boyunca tunellər, körpülər inşa ediləcək, bütün zəruri infrastruktur yaradılacaq. “AzVirt” MMC bu yolun tez bir zamanda ərsəyə gəlməsində var gücü ilə çalışır və peşəkar əməkdaşlarını bu işin reallaşdırılmasına cəlb edib.
DAVAM EDƏN LAYİHƏLƏR
-Laçın rayonunda Beynəlxalq hava limanının tikintisi
-Zəngilan Beynəlxalq hava limanının tikintisi
-Füzuli - Hadrut avtomobil yolunun tikintisi
-Zəfər Yolunun tikintisi
-Füzuli Beynəlxalq hava limanının tikintisi
-Əhmədbəyli - Füzuli - Şuşa avtomobil yolunun km 34+000 - km 51+000 hissəsinin tikintisi
1993 - 1995-ci illərdə Almaniyanın "WIRTGEN" şirkətinin mütəxəssislərinin köməyilə Bakı Aeroportunda 2 saylı uçuş-enmə zolağının tikintisi müvəffəqiyyətlə həyata keçirildi. 1995-ci il mayın 28-də həmin obyektin açılış mərasimində çıxış edən Azərbaycan Prezidenti Heydər Əliyev məsləhət bildi ki, alman mütəxəssisləri ilə əlaqələr davam etdirilsin. Beləliklə, 1995-ci ildə "AzVirt" Azərbaycan - Almaniya Birgə Müəssisəsi yaradıldı. Sonradan Müəssisənin adı dəyişdirilərək "AzVirt" Məhdud Məsuliyyətli Cəmiyyət adlandırıldı. İlk öncə Bakı ərazisində şəhər yollarının tikintisi ilə məşğul olan şirkət, zaman keçdikcə yol və hava limanı infrastruktur layihələri üzrə tam xidmət göstərən beynəlxalq şirkətə çevrildi.
"AzVirt" Azərbaycanın ən böyük və tanınmış yol tikinti şirkətlərindən biridir. Yarandığı tarixdən başlayaraq 20 ildən çox müddət ərzində "AzVirt" regionda nəqliyyat infrastrukturunun inkişafı üçün getdikcə artan tələbləri qarşılamaq məqsədi ilə sürətlə böyüyüb və fəaliyyət dairəsini genişləndirib.
Hal-hazırda "AzVirt" aşağıdakı xidmətlər üzrə ixtisaslaşıb:
Avtomobil yollarının tikintisi, yenidənqurulması və təmiri
Körpülərin, yol ötürücülərinin və digər süni qurğuların tikintisi, yenidənqurulması və təmiri
Hava limanları üçün terminalların, uçuş-enmə zolaqlarının, sükan yollarının və perronun tikintisi, yenidənqurulması və təmiri
Tikinti materiallarının istehsalı
Layihələndirmə işləri
"AzVirt" müştərilərinə çöl-axtarış (geodeziya), layihələndirmə və tikinti işləri daxil olmaqla kompleks xidmətlər təqdim edir.
Zəngin iş təcrübəsi və yüksək keyfiyyət standartlarına nail olmaqla, "AzVirt" regionun ən böyük tikinti layihələrində baş podratçı kimi iştirak edir.
Şirkət tikdiyi avtomobil yollarının yüksək beynəlxalq tələblərə cavab verməsi üçün ilk növbədə dünyanın inkişaf etmiş ölkələrinin bu sahədə yüksək elmi nailiyyətləri və qabaqcıl təcrübəsini öyrənərək öz fəaliyyətində tətbiq edir. "AzVirt" Azərbaycanda ilk dəfə olaraq qırmadaş-mastikalı və polimerli asfaltbeton qarışığını tətbiq edən şirkətdir. İstehsal edilən asfaltbetonun tərkibində aktivləşdirilmiş mineral tozlardan istifadə edilir.
Şirkətin məqsədi bütün texniki, iqtisadi və estetik parametrləri nəzərə alaraq müştərinin tələblərini qarşılamaq üçün ən yaxşı həll yollarını tapmaqdır. Dürüstlük və səmimi iş əlaqələrinə əsaslanaraq, eyni zamanda yüksək keyfiyyətli iş və peşəkarlıq nümayış etdirərək, Şirkət əməkdaşlıq anlayışını daim yüksək tutur.
Şirkət işçilərinin peşəkarlığı işin hər bir sahəsində möhkəmlənmiş aşağıdakı dəyərlərdən qaynaqlanır: Keyfiyyət, Təhlükəsizlik, İnam, İnnovasiya, Komanda İşi, Məsuliyyət və Daim Öyrənmək.
