İsrail nümayəndə heyəti Yasamal RİH-də görüşlər keçirib
Bakıda səfərədə olan İsrailin Kiryat Yam şəhər meriyasının nümayəndə heyəti Yasamal Rayon İcra Hakimiyyətində görüşlər keçirib. Görüşdən öncə inzibati binada Ulu Öndər Heydər Əliyevin büstü önünə gül dəstələri qoyuldu, əziz xatirəsi yad edildi.
Daha sonra xarici qonaqları salamlayan Yasamal Rayon İcra Hakimiyyətinin başçısı Elşad Həsənov vurğuladı ki, Azərbaycan-İsrail dövlətlərarası münasibətləri yüksək səviyyədədir və bu əlaqələrin əsasını məhz Ulu Öndər qoyub. Bu gün isə bu münasibətləri Azərbaycan Prezidenti cənab İlham Əliyev daha da inkişaf etdirərək yeni mərhələyə çıxarır. İcra başçısı bildirdi ki, İsraildə artıq Azərbaycan səfirliyi fəaliyyətə başlayıb və Azərbaycan nümayəndə heyəti İsraildə səfərdə olub. Daha sonra Rayon İcra Hakimiyyətnin başçısı Elşad Həsənov Yasamal rayonu barədə qonaqlara ətraflı məlumat verdi.Qeyd olundu ki, Bakıda və Azərbaycanda tarixən digər xalq və etnik qruplara yüksək tolerantlıq mövcud olub və bu gün də bu ənənə davam edir.Bildirildi ki, Yasamal rayonu ilə Kiryat Yam şəhəri arasında qardaşlaşmış şəhərlər münasibətlərinin qurulması üçün yaxşı zəmin var.
Daha sonra söz alan Kiryat Yam şəhər merinin müavini Adam Amilov Azərbaycanda səfərdə olmaqdan son dərəcədə məmnun olduğunu etiraf etdi. Cənab Amilov əslən Azərbaycandan olduğu barədə məlumat verdi. Bildirildi ki, Azərbaycanda heç zaman antisemitizm olmayıb və yəhidilərə hər zaman isti münasibət olub. Kiryat Yam şəhər merinin müavini ikitərəfli münasibətlərin müxtəlif aspektlərini qurmağa və dərinləşdirmyə hazır olduqlarını ifadə etdi. Sonda xatirə fotosu çəkildi.
Yasamal Rayon İcra Hakimiyyətində vətəndaş qəbulları davam edir
Azərbaycan Respublikasının Prezidenti cənab İlham Əliyevin vətəndaşların müraciətlərinin həlli ilə bağlı göstərişinə uyğun olaraq paytaxtın Yasamal rayonunda sakinlər üçün iyul ayı üzrə növbəti qəbul keçirilib.Yasamal Rayon İcra Hakimiyyətinin başçısı Elşad Həsənov sakinləri qurumun inzibati binasında qəbul edib.Tədbirdə habelə Yasamal RİH-in məsul şəxsləri, MKTB və rayon bələdiyyəsinin rəhbərliyi də iştirak edib. Sakinləri salamlayan İcra Hakimiyyətinin başçısı Elşad Həsənov onlardan üzləşdikləri problemlər bərədə məlumat verməyi xahiş etdi. İlk öncə söz alan Yasamal rayon sakinləri Azərbaycan Respublikasının Prezidenti cənab İlham Əliyevə vətəndaşların hakimiyyət orqanları tərəfindən mütəmadi qəbuluna dair tapşırığına görə dərin minnətdarlığını ifadə etdilər. Daha sonra növbə ilə söz alan Yasamal rayonunun sakinləri mənzil-məişət şəraitinin yaxşılaşdırılması, istismar müddəti bitmiş evlərə görə kompensasiya məbləği, yaşayış binalarındakı mənzillərin özəlləşdirilməsi, uşaq bağçalarına qəbul prosesi, incəsənət xadimlərinin mənzil növbəsi və bir sıra sosial xarakterli məsələlər qaldırdılar.
İcra başçısı Elşad Həsənov qəbul zamanı müraciət edən rayon sakinlərini dinləyərək onların problemlərinin aradan qaldırılmasına dair RİH əməkdaşlarına bir sıra göstərişlər verdi. İcra başçısı sakinləri maraqlandıran suallara ətraflı cavablar və izahatlar verdi. Qəbul zamanı bəzi məsələlər yerindəcə həll edildi, icrası vaxt tələb edən müraciətlər isə araşdırılaraq həll edilməsi üçün icraata götürüldü.
İcra başçısı ərazidə Yasamal sakinləri ilə görüşdü
Azərbaycan Respublikasının Prezidenti cənab İlham Əliyevin dövlət qurumları rəhbərlərinin əhali ilə görüşlərinin keçirilməsi barədə tapşırığına uyğun olaraq Yasamal rayonunda növbəti səyyar görüş keçirilib. Sakinlərin problemlərinin həlli məqsədilə təşkil olunan görüşdə Yasamal Rayon İcra Hakimiyyətinin başçısı Elşad Həsənov rayon bələdiyyəsinin inzibati binasında vətəndaşlarla görüşüb. Görüşdə Yasamal rayonunun sakinləri, həmçinin rayon icra hakimiyyətinin məsul şəxsləri, Mənzil Kommunal Təsərrüfatı Birliyinin və Bələdiyyənin rəhbərliyi, habelə xidmət sahələrinin rəhbərləri iştirak ediblər.Sakinləri salamlayan Yasamal Rayon İcra Hakimiyyətinin başçısı Elşad Həsənov “Heydər Əliyev ili” çərçivəsində rayonda görülən işlər və həyata keçirilən silsilə tədbirlər barədə geniş məlumat verdi. İcra başçısı həmçinin qəbullar və vətəndaş müraciətlərinin operativ həllinə dair statistika ilə bölüşdü və bildirdi ki, müraciətlərin əksəriyyəti öz müsbət həllini tapır. Qəbulda çıxış edən rayon İcra Hakimiyyətinin başçısı Elşad Həsənov ölkə Prezidenti cənab İlham Əliyevin tapşırıq və tövsiyələri əsasında ölkədə aparılan sosial-iqtisadi islahatlar, əhalinin rifah halının yüksəlməsi istiqamətində görülən işlər barədə vətəndaşlara ətraflı məlumatlar verdi. Daha sonra isə sakinlərdən qarşılaşdıqları problemlər barədə ətraflı danışmağı xahiş etdi.
Söz alan vətəndaşlar həyətlərin asfaltlanması, nizamsız ticarət köşklərinin yığışdırılması, məişət tullantıları konteynerlərinin sayının artırılması, küçə boyunca avtoparkinq üçün qanunsuz zəncirləmə və dirəklərin quraşdırılması və bununla mübarizə, avtobus marşrut xətlərinin artırılması, içməli su təchizatı və saygacların quraşdırılması və digər məsələlərlə bağlı öz təklif, şikayət və fikirlərini bildirdilər.Qəbulda Yasamal Rayon İcra Hakimiyyətinin başçısı Elşad Həsənov sakinlərin suallarına geniş şəkildə cavablar verdi.Bir sıra problemlərin həllinə dair RİH əməkdaşlarına birbaşa göstərişlər verildi.Səyyar qəbulda sakinlərin arzu və təklifləri dinlənildi, səsləndirdikləri məsələlərin həlli ilə bağlı tədbirlər müəyyənləşdirildi.
Görüş sakinlər tərəfindən razılıqla qarşılandı. Sakinlər əvvəlki qəbullar zamanı qaldırdıqları məsələlərin həlli ilə bağlı görülən işləri də yüksək qiymətləndiriblər, ölkə Prezidenti cənab İlham Əliyev və Birinci vitse-prezident Mehriban xanım Əliyevanın ünvanına minnətdarlıq dolu xoş sözlər ifadə ediblər.
