Dünya 2 ildir ki, koronavirusun məngənəsindədir. Virusla mübarizə tam sürətlə davam edərkən, İngiltərədən cansıxıcı xəbərlər gəlir.
Xarici KİV xəbər verir ki, koronavirusdan ən çox zərər çəkən ölkələrdən olan İngiltərədə Lassa virus panikası yaşanıb.
Bu ölkədə iki nəfərdə Ebolaya bənzər nadir bir virus olan Lassa qızdırması aşkarlanıb, üçüncü şəxs isə yüksək şübhə ilə təcrid olunub.
Səhiyyə rəsmiləri İngiltərənin şərqində eyni ailənin üçüncü mümkün hadisəsinin araşdırıldığını açıqlayıb.
Bu hallar son onillikdə ölkədə ilk təsdiqlənmiş Lassa halı olsa da, Böyük Britaniyanın Sağlamlıq Təhlükəsizliyi Agentliyi insandan insana yoluxmanın nadir olduğunu və insanların əksəriyyətinin tam sağaldığını vurğulayıb.
Yoluxmaların virusun endemik olduğu Qərbi Afrikadan bu yaxınlarda qayıtmış eyni ailədən olduğu güman edilir.
Qeyd edək ki, Lassa qızdırması Qərbi Afrikada müşahidə olunan, kəskin şəkildə inkişaf edən və ölümcül ola bilən viral xəstəlikdir.
Qərb dünyası tərəfindən 1969-cu ildə Nigeriyada işləyən iki tibb bacısının ölümü ilə diqqət çəkib. Xəstəlik Lassa şəhərində görüldüyü üçün “Lassa virusu” kimi tanınır. Lassa virusu gündəlik təmaslarla ötürülmür. Lakin istifadə olunan tibbi ləvazimatlarla yoluxduğu müşahidə edilib.
