İş adamı Murad Nəsirullayev - “7 fevral prezident seçkiləri yeni dövrün başlanğıcı oldu. Seçkilərdə xalqın 92,12 faiz səsini qazanaraq Prezident seçilən cənab İlham Əliyevin fevralın 14-də Milli Məclisdə andiçmə mərasimi keçirildi. Bundan sonra da Azərbaycanın hərtərəfli inkişafı, ərazi bütövlüyümüzün qorunması üçün əlindən gələni əsirgəməyəcəyəni bildirən dövlət başçısı son 20 ildən artıq dövrdə Azərbaycan xalqının dəstəyi ilə görülən işlərdən, qazanılan uğurlardan, qələbələrdən geniş bəhs etdi. Bir daha vurğulandı ki, 2003-cü ildə verilən bütün vədlər yerinə yetirildi. Əldə edilmiş bütün nailiyyətlərin mənbəyi Azərbaycan xalqı, onun Prezidentə göstərdiyi inam və vahid amal ətrafında birləşmə bacarığıdır. Azərbaycan xalqı dünyaya sübut edib ki, böyük xalqdır, öz taleyimizi özümüz həll edirik. Ölkəmiz bu illər ərzində sürətli inkişaf yolu keçdi, tarixi nailiyyətlər qazandı. Hər bir ölkənin tərəqqisində əsas amil olan iqtisadiyyatın inkişafı istiqamətində atılan addımlar və uğurlu nəticələr bu gün işğaldan azad edilmiş ərazilərimizdə aparılan genişmiqyaslı bərpa-quruculuq işlərində özünün aydın ifadəsini tapır. Son 20 ildən artıq dövrün reallıqları fonunda güclü Azərbaycanı görür və bundan böyük qürur hissi keçiririk. Dövlət başçısı İlham Əliyev andiçmə mərasimində bu məqamı xüsusi vurğuladı ki, güclü Azərbaycan həmişə hədəfimiz olub. Əgər güclü Azərbaycan qurmasaydıq, kimdənsə istər siyasi, istər iqtisadi sahədə asılı olsaydıq, heç vaxt ərazi bütövlüyümüzü bərpa edə bilməzdik.”
Murad Nəsirullayev diqqəti cənab İlham Əliyevin 2018-ci ildə keçirilən andiçmə mərasimində qarşıya qoyduğu hədəflərə yönəldib: “Dövlət başçısı bildirmişdir ki, Azərbaycanı daha da qüdrətli ölkəyə çevirəcəyik. Hər bir sahə üzrə konkret proqramlarımız, planlarımız var. Güclü siyasi iradə, böyük maliyyə resurslarımız, xalq-iqtidar birliyi var. Gələcəyə çox böyük nikbinliklə baxırıq. Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar.
Bu gün bu çağırışların hər biri reallıqda öz əksini tapıb. Azərbaycan həmin andiçmə mərasimindən cəmi 2 il yarım sonra Müzəffər Ali Baş Komandan İlham Əliyevin qətiyyəti, ordumuzun gücü, xalqımızın yumruq kimi birliyi sayəsində torpaqlarımızın böyük bir hissəsini azad etdi. Şəhidlərimizin və on minlərlə Azərbaycan gəncinin şücaəti, fədakarlığı, qəhrəmanlığı sayəsində bu gün ərazi bütövlüyümüzü, öz ləyaqətini bərpa edən xalq kimi yaşayırıq, şəhər və kəndlərimizi yenidən qururuq. Cənab İlham Əliyev hər bir çıxışında ərazi bütövlüyümüzün və suverenliyimizin tam bərpa olunmasının əsas hədəf olduğunu bildirmişdi. Tarixi Zəfərimizdən üç il sonra suverenliyimizin bərpa olunması ilə ölkəmizin həyatında yeni dövr başladı.”
“Dövlət başçısı nitqində bu reallığı da xüsusi qeyd etdi ki, əgər Ermənistan və onun rəhbərliyi, arxasında dayanan qüvvələr beynəlxalq hüquqa, BMT Təhlükəsizlik Şurasının dörd qətnaməsinə əməl, böyük dövlətlər Ermənistana onun işğalçılıq siyasətinə görə sanksiyalar tətbiq etsəydilər bəlkə də müharibəyə ehtiyac qalmazdı”. Müharibədən sonrakı dövrdə də Azərbaycan bütün məsələlərdə prinsipial mövqeyini göstərib. Ermənistanın üzərinə düşən öhdəlikləri yerinə yetirməməsi, mütəmadi hərbi təxribatlar törətməsi bir günlük antiterror tədbirlərini qaçılmaz etdi. Azərbaycan Silahlı qüvvələrinin ötən ilin 19 sentyabr tarixində həyata keçirdikləri lokal antiterror tədbirləri nəticəsində suverenliyimiz tam təmin olundu. Azərbaycan ərazisində seperatizmin kökü kəsildi.
Dövlət başçısı yeni dövrün hədəflərini açıqladı: “Həmişə olduğu kimi bu gün də hərbi gücümüzün artırılması prioritetdir. Bu gün istər sənaye inkişafı, istər hərbi sənaye kompleksi sahəsində və ümumiyyətlə, hərbi sahədə texnoloji inkişaf böyük əhəmiyyət daşıyır. İkinci Qarabağ müharibəsi, həmçinin bir günlük antiterror əməliyyatı zamanı bunu hər kəs gördü. Təbii ki, Qələbəmizin əsas amili Azərbaycan döyüşçüsüdür. Düşməni məhv edən və Bayrağı azad edilmiş torpaqlara sancan əsgərdir, zabitdir. Ancaq texniki vasitələr az rol oynamır. Ölkəmiz texniki vasitələr hesabına İkinci Qarabağ müharibəsindən minimum itkilərlə çıxdı. Cənab İlham Əliyev nitqində bu çağırışı da səsləndirdi ki, yeni dövrdə xarici siyasət istiqamətində yeni üfüqlər açmalıyıq. Əgər əvvəlki dövrdə xarici siyasətimizin əsas istiqaməti Ermənistan-Azərbaycan münaqişəsinin həlli idisə, bu gün artıq bu məsələ gündəlikdə durmur. Xarici siyasətimizin yeni istiqamətləri üstünlük təşkil etməlidir.”
“Qazanılan uğurlar, zəfərlər, həmçinin müəyyənləşdirilən yeni hədəflər bu reallığı təsdiqləyir ki, Azərbaycan daim irəli baxır. Hər bir hədəfə zamanında nail olur. İrəli sürdüyü təşəbbüslər beynəlxalq dəstək qazanır. Hər bir enerji layihəsinin uğurlu sonluqla başa çatması əməkdaşlığın coğrafiyasının genişləndirilməsində əhəmiyyətli rol oynayır. Avropa ilə Asiyanın qovuşağında yerləşən Azərbaycan nüxtəlif mədəniyyətləri, dinləri bir araya gətirir, dostluq körpüsü yaradır. Azərbaycan daim ənənələri olan ölkə kimi dəyərləndirilir. Cənab İlham Əliyev andiçmə mərasimindəki nitqində bir daha bu çağırışı etdi: “Biz elə bir gənc nəsil yetişdirməliyik ki, onlar da daim bizim kimi milli ənənələrə, milli-mənəvi dəyərlərə sadiq olsunlar, onların beyinləri saf olsun.” Bunun üçün bütün cəmiyyətin həmrəy olması vacib amildir. Bu gün belə bir həmrəyliyin şahidiyik. Prezident İlham Əliyev 7 fevral prezident seçkilərinin fonunda bu məqamı xüsusi qeyd etdi ki, seçkilərdə göstərilən həmrəylik cəmiyyətimizi bir qaya kimi möhkəmləndirir və belə olan halda heç bir kənar qüvvə bizə qarşı heç bir məkrli plan həyata keçirə bilməz”.
Murad Nəsirullayev hər bir çağırışın güclü Azərbaycanın qarşısında geniş imkanlar açdığını bildirib: “Cənab İlham Əliyevin qeyd etdiyi kimi, yeni dövrə alnı açıq, üzü ağ qədəm qoyuruq. Yeni dövr uğurla başlayır, uğurla da davam edəcək.”
