Ağcabədi Rayon İcra Hakimiyyətinin başçısı Rafil Hüseynov iyunun 1-də növbəti səyyar qəbulunu Pərioğullar kəndində keçirib.
R.Hüseynov YAP Ağcabədi rayon təşkilatının sədri, yerli hüquq-mühafizə orqanlarının, idarə, müəssisə, təşkilat, kənd ərazisində fəaliyyət göstərən xidmət sahələrinin rəhbərləri, fermerlər, torpaq mülkiyyətçiləri, sahibkarlar və kənd sakinlərinin iştirak etdiyi qəbulda çıxış edərək, vurğulayıb ki, ölkə başçısı İlham Əliyevin tapşırıq və tövsiyələrinə uyğun olaraq keçirilən səyyar qəbulların əsas məqsədi yerlərdə sakinlərin müraciətlərini dinləmək və onları narahat edən məsələlərin həllinə nail olmaqdır. Bu, təkcə tapşırığın yerinə yetirilməsi deyil, həm də ölkədə aparılan sosisl siyasətin tələblərinə cavab verməkdir.
Rayon rəhbəri pandemiya ilə əlaqədar olaraq, əvvəllər əhali ilə görüşlərin məhdudluğundan danışıb. Qeyd olunub ki, bu ilin mart ayından artıq karantin qaydalarının yumşalması ilə yerlərlə əlaqələr intensivləşib. İndi rayon rəhbərliyi yerlərdə əhali ilə sıx təmasda ola bilir. Bugünki səyyar qəbul buna əyani sübutdur. Yeri gəlmişkən qeyd edək ki, icra başçısının yerlərə tək yox, hüquq-mühafizə orqanlarının və digər idarə, təşkilat rəhbərləri ilə birgə getməsi əhalinin rastlaşdığı çətinlik və problemlərin yerində və vaxtında həll olunmasına böyük köməklik göstərir. Təkcə onu göstərmək kifayətdir ki, ötən il rayon icra hakimiyyətinin nəzdində fəaliyyət göstərən MOB Mərkəzinə rayon sakinləri tərəfindən daxil olan müraciətlərin 81 faizi tam, 7 faizi isə qismən öz həllini tapıb.
Rayon rəhbəri Ağcabədinin yaxın vaxtlarda tanınmaz dərəcədə inkişaf edəcəyini, daha da irəliləyəcəyini xüsusi ilə vurğulayıb.
Səyyar qəbulda sakinlər bu görüşlərin onların təklif və müraciətlərinə yerində baxılması baxımından mühüm əhəmiyyət daşıdığını bildiriblər. Kənddə uşaq bağçasının yararsız halda olduğunu, internet xəttinin yoxluğunu, kənd məktəbində istilik sisteminin mövcud olmadığını, əhalinin içməli su sarıdan çətinlik çəkdiyini vurğulayan sakinlər bəzi məsələlərin yerində həllini tapmasına görə öz təşəkkür və minnətdarlıqlarını bildiriblər. Səmimi ab-havada keçən görüşdə sakinlər əhalinin problemlərinin həlli istiqamətində həyat keçirilən tədbirlərə, göstərilən diqqətə görə, ilk növbədə, dövlətimizin başçısı cənab İlham Əliyevə borclu olduqlarını bildiriblər.
Sonda rayon rəhbəri vətəndaşların müraciətlərinə həssaslıqla baxılması ilə bağlı ölkə Prezidentinin qarşıya qoyduğu vəzifələrin bundan sonra da Ağcabədi Rayon İcra Hakimiyyətinin gündəlik fəaliyyətinin əsasını təşkil edəcəyini bildirib.
Ağcabədidə barama tədarükünə start verilib
Ağcabədidə barama tədarükünə başlanılıb. Rayon dövlət aqrar inkişaf mərkəzində təşkil edilən barama qəbulunda Ağcabədi Rayon İcra Hakimiyyətinin başçısı Rafil Hüseynov da iştirak edib. Rayon rəhbəri kümçülərə uğurlar diləyib.
Qeyd edək ki, müqavilə əsasında bölgənin qəsəbə və kəndlərində fəaliyyət göstərən 361 nəfər kümçü tərəfindən cari mövsümdə bol barama yetişdirilib. Kümçülər artıq günün əvvəlində qəbul məntəqəsinə məhsul təhvil veriblər. Respublikamızda barama tədarükü üzrə ilkə imza atan kümçülərimiz qəbul prosesinə fəallıqla qoşulublar. Qəbulda ilk iştirak edən Qaraxanlı kənd sakini Camal Əzimov 73, Yeni Qaradolaq kənd sakini, Ağdam köçkünü Kamil Abdullayev 79, Boyat kənd sakini Səbuhi Ələkbərov 45, Ağcabədi şəhər sakini Niyazi Salmanov isə 29 kiloqram məhsul təhvil veriblər.
Barama qəbulu Şəki “İpək” Məhdud Məsuliyyətli Cəmiyyətinin mütəxəssisi Beydulla Zahirov tərəfindən həyata keçirilir. Onun sözlərinə görə təhvil verilən məhsulların keyfiyyəti qənaətbəxşdir. Onların arasında Niyazi Salmanovun təhvil verdiyi barama xüsusilə daha yüksək keyfiyyətli hesab olunur. Rayonda barama tədarükü davam edir.
.JPG)
