Bu gün tələbələrin müasir standartlara uyğun bilik əldə etməsi məqsədilə universitetdə tam şərait yaradılıb ki, bu da təhsil müəssisəsinin üzərinə düşən vəzifələrin həllinə doğru atılan addımları daha da sürətləndirir. Məqsəd mütəxəssis hazırlığının keyfiyyətini daha da yaxşılaşdırmaq üçün tədris prosesini təkmilləşdirmək, innovasiyalı təhsilə keçməklə universitetin reytinqini yüksəltməkdir. Bütün bunların təmin edilməsində zəngin maddi-texniki baza, zəruri tədris avadanlıqları ilə təminat, pedaqoji heyətin peşəkarlığı və tələbələrin fəal təhsilə cəlb edilməsi böyük əhəmiyyət kəsb edir.
Universitetin hazırkı zəngin maddi-texniki bazası ölkəmizdə fəaliyyət göstərən ali təhsil müəssisələrinin çoxundan fərqlidir. Son illərdə tədris korpuslarının müasir standartlara uyğun təmiri, yeni tədris laboratoriyalarının quraşdırılması, yüksək zövqlə inşa edilib istifadəyə verilən 520 yerlik tələbə yataqxanası-“Tələbə evi” bütün sadalananlara tam cavab verir.
Qeyri-neft sektorunda böyük rolu olan kənd təsərrüfatı ixtisasları üzrə mütəxəssis hazırlığının ölkəmiz üçün mühüm əhəmiyyəti də danılmazdır.
Qarşıda bu gün daha ciddi məsələlər dayanır. Bütün sahələrdə böyük irəliləyişlər əldə edilən Azərbaycanda, aqrar bölmənin inkişafı daha prioritetdir. Axı, Azərbaycan kənd təsərrüfatının inkişafı üçün kifayət qədər münbit iqlimə, zəngin təbii resurslara malikdir. Qeyri-neft sektorunun inkişafına xüsusi qayğı göstərən Prezident İlham Əliyevin qarşıya qoyduğu vəzifələri icra etmək üçün zəngin flora və faunası olan Azərbaycanın kənd təsərrüfatının strateji inkişafı günün vacib məsələlərindəndir. Bərəkət mənbəyi olan torpağın elmi sirlərini öyrənmək uğurlarımızın açarıdır.
Tam əminliklə deyə bilərik ki, zəngin tarixi ənənələrə malik olan Azərbaycan Dövlət Aqrar Universiteti həmişə olduğu kimi, bundan sonra da dövlətimizə, dövlətçiliyimizə sadiqliyini qoruyacaq, qarşıda duran əzəmətli vəzifələri uğurla yerinə yetirəcəkdir.
Aqrar Universitetin bir qrup əməkdaşı Ulu Öndər Heydər Əliyevin əziz xatirəsini ehtiramla anıb
Müasir müstəqil Azərbaycan dövlətinin memarı və qurucusu, dünyaşöhrətli siyasi xadim, xalqımızın ümummilli lideri Heydər Əliyevin vəfatından 18 il keçir.
Azərbaycan Dövlət Aqrar Universitetinin (ADAU) rektoru, AMEA-nın müxbir üzvü, professor İbrahim Cəfərovun rəhbərliyi ilə universitetin bir qrup əməkdaşı Ulu Öndər Heydər Əliyevin şəhərin mərkəzində ucalan abidəsini ziyarət edib, önünə tər gül dəstələri düzüb, əziz xatirəsini dərin ehtiramla yad ediblər.
ADAU tələbələri Hacıqabul Təlim Mərkəzində olublar
Azərbaycan Dövlət Aqrar Universitetinin (ADAU) aqronomluq ixtisası üzrə təhsil alan bir qrup tələbəsi “AGRODAİRY” MMC-nin Hacıqabul Təlim Mərkəzində təlimdə iştirak edirlər.
"Payızlıq buğdanın inkişaf fazalarından asılı olaraq mineral gübrələrin verilməsi normaları və vaxtları" adlı ilk təlim həm mərkəzdə, həm də buğda sahəsində baş tutub.
Təlimin məqsədi Dənli bitkilərdə (buğda və arpa) yüksək və keyfiyyətli məhsul əldə edilməsində bitkinin inkişaf fazaları, mineral gübrələrin rolu, gübrələrin verilmə normaları və vaxtları barədə yeni innovativ bilik və bacarıqlar əldə edilməsi və bu sahədə "Agro DAİRY"inin təcrübəsinin bölüşülməsidir.
Qeyd edək ki, 5-6 sessiyadan ibarət olacaq təlimin sonunda iştirakçılara sertifikatlar təqdim olunacaq. Təlim müddətində tələbələrin nəqliyyat və digər xərcləri şirkət tərəfindən qarşılanacaq.
