ADAU ilə Szeged Universiteti arasında əməkdaşlıq memorandumu imzalanıb
Azərbaycan Dövlət Aqrar Universitetində (ADAU) Macarıstanın Azərbaycandakı səfirinin mədəniyyət və təhsil üzrə diplomatı Mihaly Gruberin rəhbərlik etdiyi Macarıstanın 6 universitetini təmsil edən bir qrup professor-müəllim heyəti ilə görüş keçirilib.
Görüşdə Universitetin rektoru, AMEA-nın müxbir üzvü, professor İbrahim Cəfərov qonaqları salamlayaraq Aqrar Universitetin tarixi barədə məlumat verib. Bildirilib ki, ADAU Azərbaycanda yeganə aqrar təhsil verən ali təhsil müəssisəsi kimi Macarıstan universitetləri ilə sıx əlaqədədir. Qonaqlara universitetin ikili diplom proqramları, beynəlxalq əlaqələri, müasir laboratoriyaları və təcrübə imkanları barədə geniş məlumat verilib.
Diplomat Mihaly Gruber başda olmaqla qonaqlar burada olmaqdan məmnun olduqlarını gələcəkdə də əməkdaşlıq imkanlarını daha da inkişaf etdirəcəklərini bildiriblər.
Sonra onlayn formada Macarıstanın Szeged Universiteti ilə Azərbaycan Dövlət Aqrar Universiteti arasında əməkdaşlıq memorandumu imzalanıb.
Memorandumun məqsədi gələcəkdə təhsil proqramlarının inkişaf etdirilməsi, akademik məlumatların və materialların həmçinin qarşılıqlı tələbə-müəllim mübadiləsi olub.
Qeyd edək ki, 21.000 tələbəsi olan Szeged Universiteti Avropa təhsil sistemində özünü təsdiq etmiş universitetlərdən biridir. Təxminən dünyanın 130-dan çox ölkəsindən bu universitetdə tələbələr təhsil alır. Universitetdə 12 fakültə üzrə yüzlərlə proqram tədris olunur.
Gəncədə "Unudulmaz tarix" adlı yürüş keçirilib
Gəncə Şəhər İcra Hakimiyyətinin dəstəyi, Təhsil İdarəsi, Azərbaycan Respublikası Təhsil Nazirliyi Bakı şəhəri 3 nömrəli Uşaq-Gənclər İnkişaf Mərkəzi və Gəncə Şəhər Uşaq-Gənclər İnkişaf Mərkəzinin birgə təşkilatçılığı ilə 2020-ci ilin oktyabr ayında Gəncə şəhərində baş verən terror hadisələrinin ildönümünü qeyd etmək məqsədi ilə “Unudulmaz tarix” adlı yürüş keçirilib.
Yürüşdə Gəncə Şəhər Təhsil İdarəsinin müdiri Anar Qədiməliyev, Gəncə Şəhər İcra Hakimiyyəti başçısının müavini - Sosial iqtisadi inkişafın təhlili və proqnozlaşdırılması şöbəsinin müdiri Adil Tağıyev, Icra Hakimiyyətinin məsul əməkdaşı Azər İbrahimov, Təhsil Nazirliyinin Məktəbdənkənar fəaliyyətin təşkili şöbəsinin sektor müdiri Qeyrət Şirəliyev, Azərbaycan Dövlət Aqrar Universitetinin rektoru İbrahim Cəfərov, Gəncə Regional Mədəniyyət İdarəsinin müdiri Vasif Cənnətov, Gənclər və İdman Baş İdarəsinin müdiri Həmid Nəsirov, təhsil işçiləri, Bakı şəhəri 3 nömrəli Uşaq-Gənclər İnkişaf Mərkəzi və Gəncə Şəhər Uşaq-Gənclər İnkişaf Mərkəzinin dərnək rəhbərləri və dərnək üzvləri, ümumtəhsil məktəblərinin direktorları iştirak ediblər.
Əvvəlcə ümumilli lider Heydər Əliyevin Gəncə şəhərindəki abidəsi önünə gül dəstələri düzülüb, xatirəsi dərin ehtiramla yad edilib.
Daha sonra tədbir iştirakçıları əllərində Gəncə terrorunu əks etdirən şəkillər, plakat, şüar və bayraqlarla terror törədilən məkanadək yürüş keçirib. Terror hadisəsi törədilən məkanda 3 nömrəli Uşaq-Gənclər İnkişaf Mərkəzi və Gəncə Şəhər Uşaq-Gənclər İnkişaf Mərkəzinin dərnək üzvləri ədəbi-bədii kompozisiya ilə çıxış ediblər.
Kompozisiyalarda vətənpərvərlik mövzusunda şeirlər, mahnılar səslənib, səhnəciklər nümayiş etdirilib, terror nəticəsində həlak olanların xatirəsi anılıb, hadisə yerinə gül dəstələri, şamlar və oyuncaqlar düzülüb. Tədbirin sonunda uşaqlar səmaya şəhid olan məsum körpələrin, məktəbli uşaqların xatirəsinə ağ şarlar uçurublar.
Fındıqçılıq Üzrə Texniki Sertifikat Proqramı start götürüb
Azərbaycan Dövlət Aqrar Universiteti (ADAU) ilə ABŞ Beynəlxalq İnkişaf Agentliyi (USAID) tərəfindən maliyyələşən Özəl Sektorun İnkişafı Layihəsi (PSA) “Ferrero” şirkəti birgə əməkdaşlığı çərçivəsində Fındıqçılıq Üzrə Texniki Sertifikat Proqramı (TCP) üzrə təlimlər başlayıb.
İlk sessiya 16-17 oktyabr tarixlərində Aqrar Universitein yeni tədris korpusunda baş tutub.
Fındıqçılıq sahəsini Azərbaycanda daha da inkişaf etdirilməsi və ixracatı ilə bağlı nəzərdə tutulmuş Texniki Sertifikat Proqramında 34 nəfər aqronomluq ixtisasının tələbə və məzunları iştirak edir. Proqram çərçivəsində təlimlərin növbəti 5 həftə sonu ərzində Gəncə, Quba, Qəbələ və Zaqatala rayonlarında keçirilməsi planlaşdırılır.
Təlim ənənəvi üsulla yanaşı onlayn formada da keçirildiyi üçün iştirakçılar sayca çoxluq təşkil edib.
Sonda iştirakçılarla mütəxəssislər arasında qarşılıqlı debat keçirilib.
Qeyd edək ki, təlimlərin iştirakçıları proqramın sonunda imtahan verərək beynəlxalq sertifikat alacaqlar. Növbəti sessiya 30 – 31 oktyabr tarixlərində yenidən ADAU-da təşkil olunacaq.
