Tanınmış müğənni, əməkdar artist Cavanşir Məmmədov Daxili İşlər Nazirliyinin (DİN) 12 il həbsdə olan sabiq baş əməliyyat müvəkkili Hacı Məmmədov barədə danışıb.
Əməkdar artist "Ölkə.Az"a açıqlamasında bildirib ki, 2000-ci illərin əvvəlində H.Məmmədovun sahibi olduğu istirahət mərkəzinin açılışına dəvət olunsa da, iştirak etməyib:
"2000-ci illərin əvvəlində Hacı Məmmədovun "Qarabulaq" istirahət mərkəzinə üzdə olan bütün sənətkarlar, o cümlədən də mən dəvət edilmişdim. Ancaq həmin gün toyda olduğum üçün açılış mərasiminə gedə bilmədim. Üstündən xeyli keçəndən sonra rəhmətlik İlhamə Quliyeva dedi ki, o mənim dostumdur. Həmin ərəfədə İlhamə xanımın da, bir sıra sənətçilərin də "Qarabulaq"da klipləri çəkilmişdi. Çünki səfalı yer idi. O vaxt müğənnilər "Qarabulaq"a axışırdı, kimi dindirirdin oradan gəlirdi. Özbaşına getmirdilər ha, dəvət edirdi. Görünür, musiqiyə münasibəti yaxşıymış. Ancaq heç vaxt şəxsi tanışlığımız olmayıb. Həbs ediləndən sonra televiziyada və internetdə görmüşdüm. Heç orada çıxış üçün verilən qonorar haqda da məlumatsızam.
Qeyd edək ki, 2006-cı ildə Bakı Ağır Cinayətlər Məhkəməsinin hökmü ilə Hacı Məmmədov ömürlük azadlıqdan məhrum edilib. Ötən gün isə özünü asaraq intihar edib. Onun vərəm və xərçəng xəstəliyindən əziyyət çəkdiyi bildirilirdi.
